प्रिय वाचकांना

स.न.वि.वि.

मला माझे मनोगत व्यक्त करतांना अतिशय आनंद होत आहे. आपल्या राष्ट्राची पवित्र संस्कृती जपण्याची मी किंचितसा प्रयत्न केलेला आहे. त्यामुळे माझ्या मनातील सुविचारांचा बांध मी थोपवू शकलो नाही व त्याला वाट करून मी तुमच्या समोर मांडतो आहे.

आम्ही व आमच्या सहकार्यांनी छत्रपती शाहू महाराज बहुउद्देशीय संस्था या सेवाभावी संस्थेची निर्मिती केली. आमच्या सर्वांच्या डोळ्यासमोर गोर-गरीबांची सेवा कशी करता येईल हे ध्येय होते आणि ते फॅमिली हेल्थ कार्ड या प्रकल्प अंतर्गत कार्यान्वित केले आहे. त्याची थोडक्यात तोंड ओळख मांडत आहे.

आजच्या स्पर्धेच्या युगात माणसाचे आयुष्य फार धोकादायक झालेले आहे. त्यात तर कुटुंबातील एखादी व्यक्ती आजारी पडली तर आपणास सर्व कामे बाजूला ठेवून त्या व्यक्तीची काळजी घेण्यास प्राधान्य द्यावे लागते. तेव्हा आपण खर्चाचा विचार न करता चांगल्या रुग्णालयामध्ये ॲडमिट करतो, या तुमच्या कार्याचा भार कमी करण्याचा प्रयत्न आम्ही केलेला आहे. तुमचा होणारा खर्च पैशाच्या रुपाने काही प्रमाणात का होईना कसा वाचता येईल याचा एक प्रामाणिक प्रयत्न केला आहे.

आपल्या जळगाव व छत्रपती संभाजीनगर जिल्ह्यातील तज्ञ व नामांकित पन्नास ते साठ वैद्यकीय व्यावसायिकांना फॅमिली हेल्थ कार्ड प्रकल्पात सहभागी करण्यात आले आहे. या प्रकल्पामध्ये आपल्या कुटुंबातील पाच सदस्यांना सवलतीच्या दरात उपचार करून घेता येईल. या संपूर्ण प्रकल्पाची एक सविस्तर मार्गदर्शक पुस्तिका व कार्ड तयार केले असून, ही पुस्तिका व कार्ड आम्ही व आमचे सहकारी मिळून समाजातील सर्व सामान्य लोकांपर्यंत पोहचविण्याचा एक पवित्र प्रयत्न करीत आहोत.

ही समाज सेवा करीत असतांना आम्हाला उच्च शिक्षित व नामांकित वैद्यकीय व्यावसायिकांचे अनमोल सहकार्य लाभले. या व्यावसायिकांचा व मदतीचा मी माझे सहकारी सदैव ऋणी राहतील, अशा प्रकारे आपणा सर्वांच्या सहकार्याचा व मदतीचा हात, हाती असावा हीच अपेक्षा.